查看完整版本 : 撬老友牆腳,你試過未?

laolulu 2017-6-1 02:56 AM

撬老友牆腳,你試過未?

我見過,亦都試過,以下係三個撬牆腳事件。

事件一

男主角A君與女友B小姐拍拖超過三年,並已同居,住在B小姐家中,即與女友父母同住。

可能,A君過於老定,以為同B小姐已經係「打風打唔甩」,好多時忽略咗女友,搞到女友成日話悶。點知A君唔識死,就俾老友C君乘虛而入,約B小姐去咗幾次街。

如果唔係俾人發現得早,A君真係後悔難翻。好彩箍煲成功,仲結埋婚,算佢大命啦!而C君就從此自動消失。

事件二

老友D君鍾意咗肥妹仔E小姐,但係E小姐已經有男朋友「白頭佬」,仲係大家都識。有人曾經對D君說:「E小姐又醜又肥又矮,爭到都俾人笑啦!」

但係D君一意孤行,終於追到手,冇咗個老友,得到個老婆。係咪值得?見仁見智啦!

D君同E小姐結婚,我做戥穿石。記得新娘子問過我,點解對佢班姐妹冇興趣?我冇回答,因為E小姐咁嘅款,佢班姐妹嘅質素,我不便多講啦!

至於「白頭佬」,我哋都唔知佢下落。

事件三,撬人牆腳者,就係我啦!

F君係我老友,G小姐係佢女朋友,我哋三個人當時都係同事關系。F君同G小姐拍拖冇幾耐,感情唔算好深,有次嗌咗交,進入冷戰期。我見G小姐個樣悶悶不樂,多口話放工同佢去踩roller,佢竟然話去,仲好開心㖭。

G小姐唔識踩roller,所以全程要拖實佢,而且,好多時佢驚跌親,就攬實我。攬得幾攬,搞到我都有啲feel。

踩完roller去睇戲,係一套喜劇,G小姐笑到攬住我,仲「唧」我「格啦底」。我梗係「唧」番佢,唔覺意掂到佢啲敏感部位。佢冇嬲我,仲攬得我好實,個頭俟埋我心口。睇佢嘅眼神,我感覺到G小姐好似對我.....

呢個時候,我反而有啲內疚,對唔住老友F君。事實上,我約G小姐,只係想幫佢解悶,唔係想追佢,點知會搞成咁!

睇完戲,我冇送G小姐返屋企,叫佢自己搭巴士就算喇。第二天,我照常返工,只當G小姐係普通同事,而大家都冇提昨晚嘅嘢。幾日後,我見F君好似已經氹番G小姐,個心先至安樂晒。

我算唔算係懸崖勒馬呢?一年後,我去飲佢哋嘅結婚酒,我當然好開心。後來到我結婚,F君幫我影相㖭。

======

上述三段真實故事,個個都係我老朋友,所以全部唔出真名,只用代號。希望佢哋唔好嬲我寫呢個post,之不過,如果佢哋真係唔鍾意,我會delete㗎喇。

[[i] 本帖最後由 laolulu 於 2017-6-3 09:13 PM 編輯 [/i]]

newbornbabe 2017-6-1 09:30 AM

[quote]原帖由 [i]laolulu[/i] 於 2017-6-1 02:56 AM 發表 [url=http://www.discuss.com.hk/redirect.php?goto=findpost&pid=462226264&ptid=26692361][img]http://www.discuss.com.hk/images/common/back.gif[/img][/url]
我見過,亦都試過,以下係三個撬牆腳事件。

事件一

男主角A君與女友B小姐拍拖超過三年,並已同居,住在B小姐家中,即與女友父母同住。

可能,A君過於老定,以為同B小姐已經係「打風打唔甩」,好多時忽略&#2 ... [/quote]


女人真係咁脆弱? 一有人追就散。。。

laolulu 2017-6-1 12:35 PM

我冇話所有女人都咁軟弱,只不過想叫男士們引以為戒
頁: [1]
查看完整版本: 撬老友牆腳,你試過未?